ठाणे : केरळमध्ये आयोजित केलेल्या ज्युनिअर नॅशनल पॉवरलिफ्टिंग स्पर्धेत विटावा येथील सुष्मिता सुनील देशमुखने ४७ किलो वजनी गटात रौप्यपदक जिंकून दुसरे स्थान पटकावले आहे. तिच्या या कामगिरीमुळे आगामी कॉमनवेल्थ स्पर्धेसाठी तिची भारतीय संघात निवड होणार आहे.
या स्पर्धा १७ जून २०१९ रोजी केरळला झाल्या. सुष्मिताने आतापर्यंत राज्य, राष्ट्रीय व आंतरराष्ट्रीय स्तरावर पॉवरलिफ्टिंग स्पर्धांमध्ये पाच सुवर्णपदकांसह ३२ पदकांची कमाई केली आहे. पॉवरलिफ्टिंगसारख्या क्रीडा प्रकारात एका सामान्य कुटुंबातील या मुलीने राज्य, राष्ट्रीय आणि आंतरराष्ट्रीय स्तरावर घेतलेली गरुडझेप आशादायी आहे.
केरळ येथे झालेल्या ज्युनिअर नॅशनल पॉवरलिफ्टिंग स्पर्धेत ४६ किलो वजनीगटात रौप्यपदक
जिंकून दुसरे स्थान पटकावले. दुबईतील आशियाई पॉवरलिफ्टिंग स्पर्धेतही उत्तम कामगिरी बजावली आहे. सध्या ती गोवेलीतील जीवनदीप कॉलेजमध्ये एमकॉमच्या दुसर्‍या वर्षात शिकत आहे. कारभारी जिममध्ये तिचे प्रशिक्षण सुरू असून, प्रशिक्षक विनायक कारभारी यांच्या मार्गदर्शनाखाली तिने ही यशाची शिखरे गाठली आहेत.
घरची परिस्थिती अत्यंत हलाखीची असतानाही खेळण्याची जिद्द सुष्मिताने सोडली नाही. तिला विटाव्यातील मराठा समाज संघाच्या कार्यकर्त्यांनी आर्थिक मदतीचा हात पुढे केला आहे. सुधागड तालुक्यातील वाघोशी येथील रहिवासी सेवा संघ, ठाणे, मुंबई, पुणे यांनीदेखील तिला पुढील यशासाठी शुभेच्छा दिल्या आहेत.
